Февруари во слики и зборови

Мора да признам, февруари беше многу тежок. Одамна не сум имала месец со толку предизвици и одамна не сум била толку многу тажна во ред од неколку дена. Беше вистинска емотивна бура. Тие моменти ќе ги задржам за себе, надевајќи се длабоко дека и од нив има нешто да се извлече или научи, а останатите моменти, кои некако ги овековечив, ќе ги споделам во оваа објава.

Ова е мојата моментална ситуација. Направив какао (кое не си го погодив баш), во позадина оди албум од Ezra Furman, и решив дека ќе одвојам неколку часа за оваа месечна објава. Си ветив себеси дека ќе го правам тоа секој месец, но не го правам од обврска, убаво ми доаѓа да се навраќам наназад во месецот и да размислам каде сум можела повеќе да се потрудам, или што сум можела поинаку да направам, или едноставно со нешто да се помирам.

Па, може да започнеме.
Месецов беше баш исполнет со цртање. Така почна од првиот ден. Се будев со цртање и заспивав со цртање. Мислев дека ќе ми биде мачно или дека ќе ме измори, но напротив, цртањето ми беше од огромна помош и ми доаѓаше како терапија. Кога мислите ми се преоптеретени, најмногу ми помага да правам нешто со раце. Тоа не секогаш е хоби, некогаш ми помага и да чистам, или прередувам мебел, па не е воопшто чудно што сите тие активности беа многу застапени периодов. (:
Убаво ми е и кога имам јога. <3
Едно утро кога одев накај Моки и чекав ред за ѓеврече. Сите чекавме ред за ѓеврече. (:
Месецов бев почесто од обично во Моки. Средував, пакував нарачки за испраќање, давав нарачки, отворав почесто. Имам и ново зелено другарче за кое искрено се надевам дека ќе му биде пријатно за растење.
Си дојдов дома со мимози на подарок од мајка ми и татко ми. За ручек правев тестенини со сос од брокула што многу го сакам.
Во меѓувреме ја ставив испраната нова постелнина и го ставив новото зелено другарче (сакав да имам и дома, не само во продавница) во спална. Морам да напоменам дека овој месец излезе на виделина повеќе од било кога мојата опсесија со убава постелнина.
Ете ги. (: Беа супер, нема што да не биде супер.
Како што реков, се опремив со различна постелнина. Плус, во моментов сум посебно заљубена во мешање дезени, нешто што не е многу карактеристично за мене.
Кога небото станува волку меко, јасно ми е дека сезоната почнува да се менува, и дека треба да се подготвувам за потопло време. Не е некоја тајна дека ги сакам студените месеци, сивото небо, облаците, дождот, снегот. Сепак, пролетта е секогаш добредојдена. Секако дека ја разбирам убавината и предноста на месеците што доаѓаат.
Отсекогаш сум сакала влогови, особено за реновирање домови или изработување мебел. Но за време на пандемијата целосно се опседнав со корејски влогови. Особено сум заљубена во влоговите на Ондо. Открив и многу други супер влогери, ама секогаш најмногу уживам кога ги гледам нејзините видеа. Во последно време гледам и влогери кои снимаат thrift hauls, односно си ги снимаат одењата во продавници со мебел на старо и после покажуваат како ги користат купените работи. Немам баш осет кога гледам вакви видеа и често се заборавам и губам во нив, ама никогаш не ми е криво, напротив. (:
Оваа приквечер си направив кафе бидејќи беше време да седнам и да направам еден мал проект со глина. Сакав да направам шнолички во облик на различни лепчиња за да ги подарам наредниот ден на девојка која отвори пекара. Користев полимерна глина, и додека се печеше си јадев слатко од смокви. Слатко од смокви сакам многу, бидејќи ме навраќа на детството. Тогаш не го сакав многу, ама обично е така со вкусовите од детството, некогаш почнуваат да ти се допаѓаат затоа што се, меѓудругото, временска машина.
Фотографијава ја направив наредното утро, бидејќи тогаш беа целосно исушени. Откако ги испеков, фигурите ги обоив со акрилни бои и ги поминав со посебен лак за заштита и малку сјај. Излегоа супер, а мене ми е омилена кифличката. (:
Доручек во пекарата. (Здраво, Зрнце!)
Денови исполнети со виткање, сечење, пакување.
Бев да ја земам пратката со оваа книга за готвење што ја нарачав преку групите на Фејзбук за препродавање работи. Ја купив затоа што ми изгледаше многу симпатично, па веднаш ја ставив на полицата во кујна. Внатре има многу убави илустрации од храна. Периодов, кога ќе најдам доволно време, ќе направам една објава тука за моите омилени работи што сум ги купила на старо, ветувам (на сите 7-8 луѓе што ми ги следат содржините! ).
По пат кон работилницата за читање и пишување љубовни писма која траеше три дена.
Книгава ја најдов случајно во книжарница, и иако насловот ми беше малку сомнителен, си ја земав. Ја разлистав таму и тоа што го фатив ми се допадна, а и плус беше последна и некако помислив дека е знак што јас сум дошла до неа. Многу често си гледам знаци кајшто не ги има баш за да оправдам нешто, ама еве, да речеме дека ова стварно беше знак (не беше). Си седнав едно сабајле, и ја прочитав во еден здив. Баш посакав да бидам повторно тинејџерка. Супер-едноставен осврт кон феминизмот, женскоста и сексуалноста. Ја препорачувам на (млади) девојки. И не само девојки.
Некогаш можеби ќе успеам да направам некоја објава за собите дома, барем додека сум уште во овој стан. Спалната ми оди најтешко да ја опремувам и декорирам. Ама во последно време се обидувам да ја направам што попријатна.
Сега за сега сум задоволна од тоа како изгледа. Секако дека би сменила 10 работи минимум ако можев. Но, добро е во моментов.
Тука бевме да искористиме некои попусти.
Морам да ја споделам серијава што ја почнав овој период. Machos Alfa, или Алфа мажи. На почетокот мислев дека е само забавна за гледање, ама со време сфатив дека е стварно супер-паметна и важна серија. Сега веќе ја гледам и по втор пат, при крај сум. Освен тоа, ми се најде и во тешките моменти.
Веге канелони. Многу беа добри. Наредниот ден пак правев канелони, само со друг фил, многу беа добри и тие, толку добри што не сум стигнала ни да ги сликнам.
Една од оние приквечери што најмногу ги сакам. Што мирисаат на кафе и на некое спокојно минато.
Многу сакам да правам супи. Оваа тука, со брокули, карфиол и кашкавал ја имам усовршено. А, да, ова доле е еден од новите тањири што ги купив месецов – уште една моја опсесија… имам многу (и опсесии и тањири).
Како што реков погоре, кога ми е тешко сакам да менувам мали работи, како распоред на мебел или украси, затоа што веројатно чувствувам дека врз такви нешта можам да имам контрола, за разлика од нештата врз кои немам. Оваа мала полица во дневна излезе супер, со многу малку промени.
Зајдисонцето што се рефлектира вака во предметите во дневна е исто така знак дека доаѓа потопло време. Заљубена сум во бојата што ја има собата во овој краток период, секогаш сакам да трае вечно, а ми значи посебно многу баш затоа што знам дека трае кратко.
Некои од нештата околу мене што ми се важни и што ми носат радост.
После многу долг ден. Односно, после многу долги денови. Пробувам да бидам присутна во моментот и да го ценам без да мислам на после. Никој не знае што ќе донесе тоа „после“.
Излегов малку да прошетам и се вратив со нови чаши и тањири, се разбира. Ја средував и организирав кујната (за ова подготвувам посебна објава).
Убав ручек и многу чест во последно време.
Го прочитав во еден здив третиот дел од Heartstopper. Heartwarming…како и самата серија.
Не знам дали го гледав филмов во соодветен период. Доста храбро од моја страна. Ме уништи, во убава смисла…има логика?
Исто така, овој месец правев 30-дневен музички предизвик на Инстаграм и таа рутина ми влијаеше многу добро. Ова е листата од Spotify.

6 thoughts on “Февруари во слики и зборови”

  1. Фала ти Мони.Февруари беше претежок и за мене и многу ме утеши твојот блог.Пишувај и сликај почесто.

    1. Monika Stojanovska

      Фала ти тебе што прочита! Се надевам дека набрзо ќе помине сѐ што те мачи.
      Прегратка!

  2. Прекрасно. Ти благодарам што ги сподели овие убави и нежни февруарски моменти со нас. Кое од кое послатко.

    Се поистоветувам со многу работи, но најмногу со емотивната бура; имам полн куфер емоции, кој во мене тежнее повеќе од два месеци. Сепак ме доведе до состојба на поголема свесност и будност, и покрај сега тага да ги заприметувам и најмалите нешта како првите качунки, црцори, новите лисја на монстерата и пилеата, тишината, топлината од чајот, мирисите, текстурите, боите.. Се надевам дека Март ќе ти донесе бран свежина и преродба, и многу спокој и сила да се носиш со било каква емотивна бура.

    Серијата Мачос Алфа е одлична, а следна ќе ја спремам Heartstopper за гледање. Убави прекривки и постелнини со живописни дезени ми се слабост и мене. Ги имам цветните, а ја меркав коцкестата и сега кога гледам колку убаво стои, мислам дека ќе попуштам и ќе ја купам 🙂

    Еве неколку топли препораки од мене:
    https://www.youtube.com/@nao.
    https://www.youtube.com/@kuro.hokkaido
    https://www.youtube.com/@FairylandCottage
    https://www.youtube.com/watch?v=zixwnhiOnxs
    https://www.youtube.com/watch?v=C5ozGHIK03A

    1. Monika Stojanovska

      Едвај чекав да најдам малку време во денот да одговорам на оваа прекрасна порака. <3 Фала ти од срце, ми го разубаве денот. И јас ти посакувам тебе полесни денови што побрзо, сигурна сум дека ќе дојдат. Во тешки моменти, овие мали детали и тоа како значат и се вредни да бидат забележани. Да, многу ти ја препорачувам серијата! Апсолутно топење е. Кога ги гледам цветните дезени некако и јас се радувам за пролетта, навистина се убави. 🙂
      И вау, фала најмногу на листата со линкови! Од тука ја знаев само Cloudy hills (ја обожавам). Обавезно ќе го проверам и останатото некое убаво, слободно попладне со кафе или чајче.
      Прегратка!

  3. Прекрасно 🥺

    Периодов имам настинка ама вакви објави ме тераат да останам здрава, а не да се разболам. Ти благодарам за пријатните моменти исполнети со естетика, меко небо и нежна енергија во овие неколку минути додека скролав низ нив. 🙂

    Сакам да прашам каде можам да си најдам вакво зелено пријателче? 😊

    1. Monika Stojanovska

      Ти благодарам на тебе што читаше и многу ми е мило што некако ти помогнало, барем за момент.
      Ти посакувам брзо заздравување! <3
      Инаку, монстерата ја купив од цвеќарата Happy Plant, тука се во Козле, но јас нарачав и онлајн, ги има на социјалните мрежи.
      Те поздравувам многу.

Напиши коментар

Вашата адреса за е-пошта нема да биде објавена. Задолжителните полиња се означени со *

Shopping Cart
Scroll to Top